Mir sin d'Grachys! E Party-Gugge mit Stil syt 1965. Rund 50 aktivi Fasnächtler mit eme Härz für d'Muusig, eme offene Gaischt und ere gheerige Portion Spass.
Mir bruuche Dini Hilf!
Nach über 40 Joor hän mir unseri musikalischi Haimet müesse verloo. Jetz hän mir d'Chance, e neye Käller zmittst in Basel uuszbaue – e Dehai nid nur für uns, sondern au für vier witeri Fasnachtsveraine. Dr Hoogge? Dr Käller isch no im Rohbau und bruucht vo Grund uff e neye Uusbau, Schallschutz und viil Liebi.
Hilf is mit ere Spänd bi unserem Crowdfunding uff Lokalhelden.ch, demit d'Grachys und d'Basler Fasnachtskultur wyterlääbe kenne. Jede Bydraag zellt!
Aktuells
D'Grachys
Grindet im Joor 1965 sin mir hitte e stolzi Truppe vo rund 50 Aggtive. Als "PartyGugge mit Stil" spiile mir Muusig, wo iifaart und Laune macht. Mir sin offe für Neyes, unvoreingenomme und bi uns stoht dr Spass in dr Kameradschaft immer im Vordergrund. Unser Markezeiche an dr Fasnacht? D wildi Mozart Larve, dr wyyse Fragg und unseri barocki Major-Dame, wo vornewägg stolziert!
Wird e Dail vo dr Symphonie!
Hesch au d'Muusig im Fokus und dr Schalk im Naggä? D'Grachsymphoniker broobe jede Mäntigzoobe vo 19:30 bis 21:30 Uhr. Kumm ganz unverbindlig verbyy, lehr uns kenne und wärd e Dail vo unserer tolle Truppe. Mir freue unss uff di!
Hol dir e Stück Grachy für dis dehai
Du muesch nid bis zur näggschte Fasnacht waarte. Unterstütz unser Verein und hol dr unseri neyschte Kollegtione diräkt in d'Stube.